နည်းပြ အမော်ရင် ခရစ္စမတ်မတိုင်ခင် ထုတ်ခံရနိုင်ကြောင်း သတိပေး ထောက်ပြလိုက်သူ

မန်ချက်စတာ ယူနိုက်တက်အသင်းရဲ့ နည်းပြ ရူဘင် အမော်ရင် အနေနဲ့ လာမယ့် ဘောလုံးရာသီအစမှာလည်း အသင်းရလဒ်တွေ ဆိုးနေမယ်ဆိုရင် အသင်းဘုတ်အဖွဲ့က သည်းခံတော့မှာ မဟုတ်ဘူးလို့ သတိပေးခံထားရပါတယ်။

မန်ယူနိုက်တက် လက်ထောက်နည်းပြဟောင်း ရီနီ မူလန်စတင်းက လာမယ့်ရာသီအစမှာ နောက်ထပ် ရလဒ်ဆိုးတွေ ကြုံတွေ့ရရင် အမော်ရင် ကို အသင်းဘုတ်အဖွဲ့က လက်ခံနိုင်မှာ မဟုတ်ဘူးလို့ ထောက်ပြခဲ့တာပါ။

“မန်ယူနိုက်တက်ရဲ့ ကစားပုံကသာ ဆက်ပြီး ဆိုးနေမယ်ဆိုရင် အမော်ရင်ရဲ့ အလုပ်က ခရစ္စမတ်မတိုင်ခင် အနားပေးခံရနိုင်တယ်။ တကယ်လို့ အခြေအနေတွေက လာမယ့်ရာသီအထိ ဆက်ဖြစ်နေပြီး ခရစ္စမတ်နားနီးလာပြီဆိုရင် ရူဘင် အမော်ရင်ရဲ့ အလုပ်က အနားပေးခံရမယ့် အခြေအနေ ရောက်လာပါလိမ့်မယ်။

ပြီးခဲ့တဲ့ရာသီက အဆိုးဆုံး ဖြစ်ခဲ့တာကြောင့် အသင်းဘုတ်အဖွဲ့အနေနဲ့ သူဆက်ပြီး မှန်ကန်တဲ့သူ ဟုတ် မဟုတ် ဆွေးနွေးရမယ့်အပြင် တခြားရွေးချယ်စရာ မရှိတော့ပါဘူး။ ဒါကြောင့် ရာသီအစကောင်းဖို့က မဖြစ်မနေ လိုအပ်ပါတယ်” လို့ မူလန်စတင်းက ပြောပါတယ်။

အမော်ရင်ဟာ သူ့ရဲ့ ၃-၄-၂-၁ ကစားကွက်နဲ့ ကစားဟန်ကို ခိုင်ခိုင်မာမာ ကိုင်စွဲထားပြီး သူ့ရဲ့ ကစားဟန်ဒဿန ဒါမှမဟုတ် အခြေခံမူတွေကို ပြောင်းလဲမှာ မဟုတ်ဘူးလို့ အကြိမ်ကြိမ် ပြောဆိုထားပါတယ်။ ဒီလို ကစားသမားတွေရဲ့ အားသာချက်နဲ့အညီ လိုက်လျောညီထွေ ပြောင်းလဲဖို့ ငြင်းဆန်တဲ့ အမော်ရင်ကို မူလန်စတင်းက သဘောကျခြင်းမရှိပါဘူး။

“ရူဘင် အမော်ရင်ရဲ့ လိုက်လျောညီထွေမရှိတာက လိမ္မာပါးနပ်မှု မရှိသလိုပါပဲ။ သူက ပျော့ပြောင်းဖို့ လိုတယ်။ မန်ချက်စတာ ယူနိုက်တက်ကို ကိုင်တွယ်တဲ့အခါ ပန်းတိုင်က အမြဲတမ်း ချန်ပီယံဆုဖလား ရဖို့ ဖြစ်သင့်တယ်။

ဒါပေမဲ့ သူက အခုလိုသာ ပြောမယ်ဆိုရင် လူတွေက သူ့ကို ရူးနေပြီလို့ ထင်ကြလိမ့်မယ်။ မန်ယူနိုက်တက်သာ ခရစ္စမတ်ရောက်တဲ့အထိ သရေတစ်ပွဲ နှစ်ပွဲ၊ ဒါမှမဟုတ် ရှုံးပွဲနည်းနည်းပဲ ရှိမယ်ဆိုရင်တော့ ကလပ်အသင်း ပြန်ကောင်းလာပြီလို့ လူတွေ ထင်ကောင်းထင်နိုင်ပေမဲ့ အမော်ရင်က သူ့ရဲ့ ကစားကွက်ထဲမှာပဲ ပိတ်မိနေပြီး အကြီးအကျယ် ထိခိုက်လွယ်နေတာကြောင့် အဲလိုဖြစ်လာမယ်လို့တော့ ကျွန်တော် မထင်ဘူး။” လို့ မူလန်စတင်းက ပြောခဲ့ပါတယ်။

အမော်ရင်ဟာ လက်ရှိ အနားယူနေပေမဲ့ မကြာခင်မှာပဲ ဇူလိုင် ၁၉ ရက်နေ့မှာ လိဒ်စ်အသင်းနဲ့ ကစားရမယ့် ရာသီကြိုပွဲစဉ်နဲ့ အမေရိကန် ခရီးစဉ်အတွက် အသင်းကို ပြင်ဆင်တော့မှာပါ။

မန်ယူနိုက်တက်ဟာ လာမယ့်ရာသီကို အိမ်ကွင်းမှာ အာဆင်နယ်နဲ့ စတင်ရမှာဖြစ်ပြီး မူလန်စတင်းကတော့ အသင်းဟာ ထိပ်ဆုံးလေးသင်းစာရင်းဝင်ပြီး ချန်ပီယံလိဂ်ဝင်ခွင့်ရဖို့ ပန်းတိုင်ထားရမယ်လို့ ပြောပါတယ်။ ပြီးခဲ့တဲ့ရာသီက ၁၅ နေရာနဲ့ အဆုံးသတ်ခဲ့တာကြောင့် ဒီပန်းတိုင်က မလွယ်ကူပါဘူး။