ယူနိုက်တက်ကို တိုးတက်အောင် လုပ်ဖို့ ရက်ကလစ်ဖ်က စိတ်မဝင်စားဘဲ ဖျ-က်ဆီ-းနေတယ် လို့ ကန်တိုနာ ပြောပြီ
မန်ချက်စတာ ယူနိုက်တက် ဂန္ထဝင်ကြီး အဲရစ် တန်တိုနာကတော့ အသင်း ပူးတွဲပိုင်ရှင် ဆာဂျင် ရက်ကလစ်ဖ် ဟာ အသင်းကို ဖျက်ဆီးနေတဲ့သူလို့ ဝေဖန်လိုက်ပါတယ်။
ယူနိုက်တက် အသင်း ပြန်လည်တည်ဆောက်တဲ့နေရာမှာ သူ့ဘက်က တတ်နိုင်သလောက် ကူညီပေးဖို့ ကမ်းလှမ်းပေမဲ့ ရက်ကလစ်ဖ်တို့ဘက်က ငြင်းဆန်ပယ်ချခဲ့တယ်လို့ တန်တိုနာ က ဖွင့်ဟပြောဆိုခဲ့ပါတယ်။
INEOS အဖွဲ့ ဥက္ကဋ္ဌဖြစ်သူ ရက်ကလစ်ဖ်ဟာ ပြီးခဲ့တဲ့နှစ်၊ ဖေဖော်ဝါရီလတုန်းက ယူနိုက်တက်အသင်းရဲ့ ရှယ်ယာ ၂၇.၇ % ကို ဝယ်ယူခဲ့ပြီး ဂလေဇာမိသားစုက ဘောလုံးကဏ္ဍနဲ့ပတ်သက်တဲ့ လုပ်ငန်းတွေမှာ ရက်ကလစ်ဖ်တို့ကို လုပ်ပိုင်ခွင့် အပြည့်အဝပေးခဲ့ပါတယ်။
ဂလေဇာမိသားစုလက်ထက်မှာ ယူနိုက်တက်အသင်းဟာ ကွင်းတွင်းအောင်မြင်မှုအပိုင်း ကျဆင်းလာပြီး ရက်ကလစ်ဖ်တို့ ရောက်လာချိန်မှာ ကန်တိုနာအပါအဝင် ယူနိုက်တက်ပရိသတ်တွေက အလှည့်အပြောင်း တစ်ခုဖြစ်လာဖို့ မျှော်လင့်ခဲ့ကြပါတယ်။
ဒါပေမဲ့ ယူနိုက်တက်အသင်းရဲ့ ကွင်းတွင်း ရလဒ်ပိုင်းက သိသိသာသာ တိုးတက်လာတာမျိုး မရှိသေးဘဲ ရက်ကလစ်ဖ်ကလည်း ကွင်းပြင်ပကိစ္စရပ်တွေဖြစ်တဲ့ အလုပ်သမား ၄၀၀ အထိလျှော့ချတာ၊ ဝန်ထမ်းတွေကို နေ့လည်စာ အခမဲ့စားခွင့်ကို ရပ်ဆိုင်းတာအပါအဝင် အသုံးစရိတ်လျှော့ချရေးကိစ္စတွေကို ဦးစားပေးဆောင်ရွက်ခဲ့ပါတယ်။
ဒါ့အပြင် ယူနိုက်တက်အသင်းကို ပြင်ဆင်ပြောင်းလဲဖို့အတွက် ကန်တိုနာရဲ့ ကမ်းလှမ်းချက်ကို ရက်ကလစ်ဖ်တို့ဘက်က ပြတ်ပြတ်သား ငြင်းဆန်ခဲ့တာကြောင့် ကန်တိုနာ ဒေါသထွက်ခဲ့တာဖြစ်ပါတယ်။
ကန်တိုနာက “ယူနိုက်တက်နဲ့ပတ်သက်တဲ့ ၂ နှစ် ဒါမှမဟုတ် ၃ နှစ်အတွင်း ပြုပြင်ပြောင်းလဲရေး စီမံကိန်းတွေကို ဆောင်ရွက်ဖို့ ယူနိုက်တက်အသင်းဆီ ကျွန်တော် ကမ်းလှမ်းခဲ့ပါတယ်။ ဒါပေမဲ့ ရက်ကလစ်ဖ်ဟာ စိတ်ဝင်စားပုံ မပြခဲ့ပါဘူး . . ”
“ကျွန်တော့်အနေနဲ့ အသင်းအတွက် အကောင်းဆုံးဖြစ်အောင် အတတ်နိုင်ဆုံး ကြိုးစားခဲ့ပြီးဖြစ်တာကြောင့် ကိုယ့်ကိုယ်ကိုယ် အပြစ်ရှိတယ်လို့ မခံစားရတော့ပါဘူး။
ဆာအဲလက်စ်ဟာ လှပပြီး ထက်မြက်တဲ့ တိုက်စစ်ကစားဟန်ကို ဖန်တီးခဲ့ပြီး ပိုင်ရှင်သစ်တွေဟာ အဲဒါကို ကျင့်သုံးသင့်ပေမဲ့ သူတို့က ဖျက်ဆီးခဲ့ပါတယ်”လို့ ဝေဖန်ခဲ့ပါတယ်။