ဒီည ယူနိုက်တက်ကို ပဲလေ့စ်နိုင်ဖို့ အလေးပေးထားတဲ့ Opta နဲ့ စိန်ခေါ်မှုကြီးမားမယ့် အဝေးကွင်းပွဲ
နည်းပြအမော်ရင်လက်ထက် ရှုံးပွဲမရှိ ပွဲဆက်အများဆုံးမှတ်တမ်းကောင်း အဆုံးသတ်ခဲ့ပြီးတဲ့နောက် ယူနိုက်တက်အသင်းဟာ ပရီးမီးယားလိဂ်နိုင်ပွဲ ပြန်ရှာဖို့ ကြိုးစားရမှာဖြစ်ပေမဲ့ ခရစ္စတယ်ပဲလေ့စ်အသင်းရဲ့ကွင်းမှာ ကြီးမားတဲ့စိန်ခေါ်မှုတွေနဲ့ ရင်ဆိုင်ရမှာဖြစ်ပါတယ်။
ယူနိုက်တက်အသင်းဟာ ပြီးခဲ့တဲ့ပွဲတုန်းက ၁၀ ယောက်ကျန် အဲဗာတန်ကို အနိုင်မရဘဲ ၁-၀ ဂိုးနဲ့ရှုံးနိမ့်ခဲ့တာကြောင့် အမော်ရင်ရဲ့ ပရီးမီးယားလိဂ် ၅ ပွဲဆက် ရှုံးပွဲမရှိမှတ်တမ်းကောင်း အဆုံးသတ်ခဲ့သလို အိုးလ်ထရက်ဖို့ဒ်မှာ ၄ ပွဲဆက်အနိုင်မှတ်တမ်းကလည်း ရပ်တန့်ခဲ့ပါတယ်။
ယူနိုက်တက်အသင်းဟာ ဒီရာသီ ပရီးမီးယားလိဂ်ပွဲတွေမှာ ဂိုးပေါက်ကန်ချက် ၁၈၃ ကြိမ်အထိပြုလုပ်ခဲ့ပြီး သူတို့ထက် အကြိမ်ပိုများတာဆိုလို့ လီဗာပူးလ်(၁၈၄ ကြိမ်)တစ်သင်းသာရှိပါတယ်။
အဲဒီ ၁၈၃ ကြိမ်ထဲက ဂိုးပေါက်တည့်မှု ၆၂ ကြိမ်အထိရှိပေမဲ့ အခုလောလောဆယ်အထိ ၁၉ ဂိုးသာ သွင်းနိုင်ခဲ့တာကြောင့် ဒီရာသီ ပရီးမီးယားလိဂ်မှာ ဂိုးပေါက်ကန်ချက်အလိုက် ဂိုးသွင်းနိုင်မှုနှုန်း အနည်းဆုံးစာရင်းမှာ အဆင့် ၇ နေရာရပ်တည်နေပါတယ်။
ခရစ္စတယ်ပဲလေ့စ်အသင်းကတော့ နည်းပြအိုလီဗာဂလက်စ်နာရဲ့ ဦးဆောင်မှုနဲ့အတူ ရလဒ်ကောင်းတွေရယူနေပြီး ဒီရာသီ ပရီးမီးယားလိဂ်မှာ ၉ ဂိုးသာ ပေးခဲ့ရတာကြောင့် အာဆင်နယ်(၆ ဂိုး)ပြီးရင် ပေးဂိုးအနည်းဆုံးပါပဲ။
ဒါ့အပြင် ခရစ္စတယ်ပဲလေ့စ်အသင်းဟာ Clean Sheets ၆ ပွဲအထိရယူနိုင်ခဲ့ပြီး ဒါကလည်း ထိပ်ဆုံးက အာဆင်နယ်(၇ ပွဲ)ပြီးရင် ဒုတိယမြောက်အကောင်းဆုံးမှတ်တမ်းဖြစ်နေပါတယ်။
ပရီးမီးယားလိဂ်အိမ်ကွင်းနောက်ဆုံး ၁၂ ပွဲမှာ ခရစ္စတယ်ပဲလေ့စ်တို့ ရှုံးပွဲလုံးဝမရှိဘဲ ၆ ပွဲနိုင်၊ ၆ ပွဲသရေကျခဲ့ပြီး ၁၉၉၀ ဖေဖော်ဝါရီကနေ ဒီဇင်ဘာလအတွင်း ၁၇ ပွဲဆက်တိုက် ရှုံးပွဲမရှိခဲ့တဲ့နောက်ပိုင်း အကောင်းဆုံးအိမ်ကွင်းစွမ်းဆောင်ရည်ပါပဲ။
ယူနိုက်တက်အသင်းကတော့ ပရီးမီးယားလိဂ်အဝေးကွင်းနောက်ဆုံး ၁၁ ပွဲမှာ ပြီးခဲ့တဲ့လတုန်းက လီဗာပူးလ်ကို နိုင်တာကလွဲရင် ၄ ပွဲသရေ၊ ၆ ပွဲအထိရှုံးနိမ့်ခဲ့ပါတယ်။
ယူနိုက်တက်အသင်းဟာ လန်ဒန်ကလပ်တွေနဲ့ အမှတ်ပေးပွဲ အဝေးကွင်းနောက်ဆုံး ၂၆ ပွဲမှာ ၃ ပွဲသာ အနိုင်ရခဲ့သလို ၇ ပွဲသရေ၊ ၁၆ ပွဲအထိရှုံးနိမ့်ခဲ့ပြီး အနိုင်ရတဲ့ ၃ ပွဲကလည်း ဖူလ်ဟမ်တစ်သင်းတည်းကို နိုင်ခဲ့တာဖြစ်ပါတယ်။
အခုနောက်ပိုင်းနှစ်တွေမှာ ခရစ္စတယ်ပဲလေ့စ်နဲ့တွေ့ရင် ယူနိုက်တက်တို့ အိမ်ကွင်း၊ အဝေးကွင်းမရွေး သိသိသာသာ ရုန်းကန်လာရပြီး ပရီးမီးယားလိဂ်နောက်ဆုံး ၄ ပွဲဆက်တိုက် အနိုင်မရတဲ့အပြင် အံ့အားသင့်စရာကောင်းတာက အဲဒီ ၄ ပွဲစလုံးမှာ ယူနိုက်တက်တို့ လုံး၀ ဂိုးမသွင်းနိုင်ခဲ့ပါဘူး။
ခရစ္စတယ်ပဲလေ့စ်အသင်းကတော့ သူတို့ကွင်းမှာ ယူနိုက်တက်နဲ့ဆုံတွေ့တဲ့ နောက်ဆုံး ၄ ပွဲစလုံး ရှုံးပွဲမရှိဘဲ ၂ ပွဲနိုင်၊ ၂ ပွဲသရေကျခဲ့ပါတယ်။
အမော်ရင်အနေနဲ့ နိုင်ပွဲပြန်ရအောင် ကြိုးစားမှာဖြစ်ပေမဲ့ အဝေးကွင်းမှာ ခရစ္စတယ်ပဲလေ့စ်ကို ကျော်ဖြတ်နိုင်ဖို့ မလွယ်ဘဲ နာမည်ကျော် Opta ကလည်း အခုပွဲမှာ ခရစ္စတယ်ပဲလေ့စ်အသင်းကို အနိုင်ရနိုင်ခြေအဖြစ် ၅၄.၁ % အထိ သတ်မှတ်ခဲ့ပြီး ယူနိုက်တက်ကိုတော့ ၂၂.၃ % သာ သတ်မှတ်ခဲ့ပါတယ်။