ယူနိုက်တက်ကနေ အမိုရင် ရောင်းထုတ်ခဲ့တဲ့ ကစားသမားက ရော်နယ်ဒိုနဲ့ နေမာ ပေါင်းစပ်ထားသလိုပဲ လို့ ချီးကျူးခံနေရ

ဒီနွေရာသီမှာ ရူဘင် အမိုရင် ‌ပေါင် ၂၂ သန်းနဲ့ ရောင်းထုတ်ခဲ့တဲ့ တိုက်စစ် ကစားသမားဟာ ခရစ္စတီယာနို ရော်နယ်ဒို၊ နေမာတို့နဲ့ နှိုင်းယှဉ်ခံခဲ့ရပါတယ်။

ဘရာဇီးတောင်ပံကစားသမား အန်တိုနီဟာ ဒီနွေရာသီမှာ ရီးရဲဘက်တစ်အသင်းကို အပြီး ပြောင်းရွှေ့သွားခဲ့တာဖြစ်ပြီး ပြီးခဲ့တဲ့ရာသီမှာ အငှားနဲ့ သွားကစားပြီးနောက် လာလီဂါကို ပြန်သွားချင်ခဲ့တာဖြစ်ပါတယ်။

အသက် ၂၅ နှစ်အရွယ်တောင်ပံကစားသမားဟာ ၂၀၂၂ ခုနှစ်တုန်းက အိုင်းယက်စ်ကနေ ပေါင် ၈၂ သန်းနဲ့ ပြောင်းရွှေ့လာခဲ့သူဖြစ်ပြီး သမိုင်းတလျှောက် ဈေးအကြီးဆုံး ဒတ်ချ်လိဂ်ကစားသမားဖြစ်လာခဲ့သလို ပရီးမီးယားလိဂ်ရဲ့ ဈေးအကြီးဆုံး ကစားသမားခေါ်ယူမှုတွေထဲက တစ်ဦးဖြစ်လာခဲ့တာဖြစ်ပါတယ်။

အန်တိုနီဟာ ပြီးခဲ့တဲ့ရာသီ ဒုတိယပိုင်းမှာ ရီးရဲဘက်တစ်အတွက် ၉ ဂိုး သွင်းယူပေးခဲ့ပြီး ဒီရာသီမှာလည်း ၁၁ ပွဲကစားပြီးချိန်မှာ သွင်းဂိုး ၆ ဂိုးနဲ့ ဂိုးဖန်တီးမှု ၂ ကြိမ် ပြုလုပ်ထားနိုင်ခဲ့ပြီဖြစ်ပါတယ်။

ရီးရဲဘက်တစ်နောက်ခံလူ မာ့စ် ဘာထရာက အခုမြင်နေရတာကမှ အန်တိုနီ စစ်စစ်ဖြစ်တယ်လို့ ယုံကြည်နေပြီး ဘရာဇီးကြယ်ပွင့်ကို ရော်နယ်ဒို၊ နေမာတို့နဲ့ နှိုင်းယှဉ်ချီးကျူးခဲ့တာဖြစ်ပါတယ်။

အန်တိုနီအနေနဲ့ ဘယ်လိုလုပ်ပြီး ရီးရဲဘက်တစ်မှာ ကစားသမားဘဝ ပြန်အသက်သွင်းနိုင်ခဲ့တာလဲလို့ မေးမြန်းခဲ့ရာမှာ ဘာထရာက မွန်ဒိုဘက်တစ်သတင်းဌာနကို အခုလို ပြောကြားခဲ့တတာပါ။

“အဲဒါက သူနဲ့ အရမ်းကို လိုက်ဖက်တဲ့ ဘောလုံးကစားဟန်ကြောင့်ပါ။ ဒါကြောင့်ပဲ ကျွန်တော်တို့ တကယ့်အန်တိုနီ စစ်စစ်ကို နောက်ထပ်တကြိမ် ပြန်မြင်နေရတာပါ။ ပိုပြီးတောင် တိုးတက်လာခဲ့တဲ့ အန်တိုနီပုံစံပေါ့။

သူနဲ့ စကားပြောခဲ့တဲ့ ပထမဆုံးနေ့မှာပဲ သူ့ရဲ့ စိတ်ဓာတ်ပြင်းထန်မှုကို မြင်ခဲ့ပြီးသားဖြစ်ပြီး သူ့ရဲ့ အရည်အသွေးတွေနဲ့အတူ၊ ဘရာဇီးသား အရည်အချင်းတွေကိုလည်း မြင်ခဲ့ရတယ်။

ကျွန်တော် အမြဲတမ်းပြော‌ဖြစ်တာက သူက နေမာနဲ့ ရော်နယ်ဒိုတို့ကို ပေါင်းစပ်ထားသလိုပဲ။ သူက ရော်နယ်ဒိုရဲ့ စိတ်ဓာတ်ပြင်းထန်မှုမျိုးရှိပြီး အမြဲတမ်း ပိုပြီးတော့ တိုးတက်ကောင်းမွန်လာချင်နေတယ်။ ပွဲအပေါ်မှာလည်း အရမ်းအာရုံစိုက်ထားတယ်။”လို့ ပြောကြားခဲ့တာဖြစ်ပါတယ်။