မျှော်လင့်ထားတာထက် ပိုပြင်းနေတဲ့ ရှက်ရှ်ကို ရဲ့ ဒူးဒဏ်ရာ ဘယ်လောက်နားရမလဲ အခြေအနေ ထွက်ပေါ်
မန်ချက်စတာယူနိုက်တက်တိုက်စစ်မှူး ရှက်ရှ်ကိုဟာ ဒူးဒဏ်ရာကြောင့် ၁ လလောက်အထိ အနားယူရဖို့ရှိနေတယ်လို့ သိရပါတယ်။
အသက် ၂၃ နှစ်အရွယ်ရှိပြီဖြစ်သူ ရှက်ရှ်ကိုဟာ အခု နိုဝင်ဘာလ ၈ ရက်တုန်းက စပါးအသင်းနဲ့ ၂-၂ ဂိုးစီ သရေကျတဲ့ ပရီးမီးယားလိဂ်ပွဲမှာ ဒုတိယပိုင်းမှ လူစားဝင်လာပြီး ပွဲပြီးခါနီး ၈၈ မိနစ်မှာ ဒဏ်ရာရခဲ့တာကြောင့် ပွဲဆက်လက်မကစားနိုင်တော့ဘဲ ကွင်းထဲကနေ ထွက်ခဲ့ရပါတယ်။
အဲဒီဒဏ်ရာကြောင့် ရှက်ရှ်ကိုဟာ ကိုဆိုဗို၊ ဆွီဒင်တို့နဲ့ကမ္ဘာ့ဖလားခြေစစ်ပွဲတွေအတွက် ဆလိုဗေးနီးယား လူစာရင်းကနေ နုတ်ထွက်ခဲ့ပြီး ယူနိုက်တက်အသင်းကတော့ ရှက်ရှ်ကိုရဲ့ဒဏ်ရာက အရမ်းကြီး မပြင်းထန်ဘူးလို့ အစောပိုင်းမှာ သတင်းထုတ်ပြန်ခဲ့ပါတယ်။
စပါးအသင်းနဲ့ပွဲအပြီး အင်တာဗျူးမှာ အမော်ရင်က “ရှက်ရှ်ကိုဟာ ဒူးဒဏ်ရာရခဲ့တာကြောင့် ကျွန်တော် စိုးရိမိပါတယ်။ ကျွန်တော်တို့အသင်းဟာ အခုထက် ပိုကောင်းတဲ့အသင်းဖြစ်လာဖို့ ရှက်ရှ်ကို,ကို လိုအပ်ပါတယ်။ ရှက်ရှ်ကိုရဲ့ဒဏ်ရာအနေအထားအပေါ် ကျွန်တော်တို့ စမ်းသပ်စစ်ဆေးမှုပြုလုပ်သွားမှာပါ”လို့ ပြောကြားခဲ့ပါတယ်။
ဒီရာသီအစက လိုက်ပ်ဇစ်ကနေ ယူနိုက်တက်ကို ပေါင် ၇၃.၆ သန်းနဲ့ရောက်ရှိခဲ့သူ ရှက်ရှ်ကိုဟာ ခြေစွမ်းပြဖို့ ရုန်းကန်နေရပြီး ၁၂ ပွဲကစား၊ ၂ ဂိုးသာ သွင်းနိုင်သလို လီဗာပူးလ်၊ စပါးအသင်းတို့နဲ့ပွဲတွေမှာ ပွဲထွက်စာရင်းကနေ ချန်လှပ်ခံခဲ့ရပါတယ်။
အခုအချိန်မှာတော့ ရှက်ရှ်ကိုဟာ ဒဏ်ရာကြောင့် ၁ လလောက်အနားယူရဖို့ရှိနေတဲ့အတွက် နိုင်ငံတကာပွဲတွေအပြီး ပြန်ကစားမဲ့ အဲဗာတန်နဲ့ပွဲအပါအဝင် ခရစ္စတယ်ပဲလေ့စ်၊ ဝက်စ်ဟမ်း၊ ဝုလ်ဗ်၊ ဘုန်းမောက်၊ အက်စတွန်ဗီလာနဲ့ပွဲတွေကို လွဲချော်ဖို့ရှိနေပါပြီ။
ယူနိုက်တက်အသင်းဟာ ရှက်ရှ်ကို,ကို ဒဏ်ရာကြောင့် ဆုံးရှုံးရမှာဖြစ်သလို လာမဲ့ဒီဇင်ဘာလအတွင်း အမ်ဘူမို၊ ဒီယာလိုတို့ကိုလည်း အာဖရိကနိုင်ငံများဖလားပြိုင်ပွဲအတွက် စေလွှတ်ရမှာဖြစ်လို့ တိုက်စစ်ပိုင်း အားနည်းချက်နဲ့ ရင်ဆိုင်ရဖို့ရှိနေပါတယ်။