ယူနိုက်တက် အတွက် လိုအပ်ရင် ၃-၄-၃ ကစားကွက်ကို ပြောင်းလဲဖို့ ဆန္ဒရှိပါတယ် လို့ လေသံပြောင်းလာတဲ့ အမော်ရင်
မန်ချက်စတာယူနိုက်တက်နည်းပြ အမော်ရင်က သူဟာ အများပြောသလို ၃-၄-၃ ကစားကွက်ကို တရားသေ စွဲကိုင်ထားသူ မဟုတ်ဘဲ အသင်းအတွက် အဆင်ပြေမယ်ဆိုရင် ဘာမဆိုလုပ်သွားဖို့ ဆန္ဒရှိတယ်လို့ ဖွင့်ဟပြောဆိုခဲ့ပါတယ်။
ယူနိုက်တက်အသင်းဟာ တနင်္လာနေ့တုန်းက အဲဗာတန်ကို အိုးလ်ထရက်ဖို့ဒ်မှာ ၁-၀ ဂိုးနဲ့ မထင်မှတ်ဘဲ ရှုံးနိမ့်ခဲ့ပြီး ပွဲကစားချိန်အတွင်း အမော်ရင်ဟာ သူ့ရဲ့ ၃-၄-၃ ကစားကွက်ကို အပြောင်းအလဲ မလုပ်ဘဲ ဒီအတိုင်းပဲ ဆက်ကစားစေခဲ့တဲ့အတွက် ဝေဖန်ခံနေရပါတယ်။
ယူနိုက်တက်အသင်း ချေပဂိုးရဖို့ အသည်းအသန် ကြိုးစားနေချိန်မှာ အမော်ရင်က သူ့ရဲ့ကစားကွက်အထိုင်ကို မပြောင်းလဲဘဲ ခံစစ် ၃ ယောက်တန်းနဲ့သာ ဆက်ကစားပြီး ဒေါ်ဂူနေရာမှာ ဒါလော့တ်၊ ကတ်စ်မဲရိုးအစား ကိုဘီမင်နူးတို့လို တိုက်ရိုက်လူစားလဲမှုတွေသာပြုလုပ်ခဲ့ပါတယ်။
အမော်ရင်ရဲ့ ယူနိုက်တက်နည်းပြဘ၀ ၁၂ လတာကာလအတွင်း ပရီးမီးယားလိဂ် ၃၉ ပွဲမှာ ၁၂ ပွဲသာ အနိုင်ခဲ့ပေမဲ့လည်း သူ့ရဲ့ ၃-၄-၃ ကစားကွက်အပေါ် ဝေဖန်မှုတွေကို ခေါင်းမာမာနဲ့ ကာကွယ်ခဲ့ပါတယ်။
အခု အဲဗာတန်နဲ့ပွဲမှာလည်း ဂေးယီ တိုက်ရိုက်အနီနဲ့ထွက်သွားလို့ ၁၀ မိနစ်ကျော်လောက်ကတည်းက ယူနိုက်တက်အသင်း ကစားသမားတစ်ယောက် အသာရခဲ့ပေမဲ့ နိုင်ပွဲမယူနိုင်တဲ့အပြင် အိမ်ကွင်းမှာ ရှုံးပွဲတွေ့ခဲ့တာဖြစ်ပါတယ်။
ပြီးခဲ့တဲ့ရက်ပိုင်းက DAZN Portugal ရုပ်သံနဲ့အင်တာဗျူးမှာ အစီအစဉ်တင်ဆက်သူက အမော်ရင်အနေနဲ့ စပို့တင်းလစ္စဘွန်းမှာတုန်းကလို တိုက်စစ်ကို ပုံသေမဟုတ်ဘဲ ရွေ့လျားတဲ့ပုံစံမျိုး အသုံးပြုသွားဖို့ရှိလားဆိုပြီး မေးခွန်းထုတ်ခဲ့တော့ အမော်ရင်က အခုလို တုန့်ပြန်လာပါတယ်။
“ဒီနေ့ခေတ်မှာ အင်္ဂလန်လိဂ်၊ ပေါ်တူဂီလိဂ်သာမက,ကမ္ဘာ့တစ်ဝန်းက လိဂ်ပြိုင်ပွဲတွေမှာ ကလပ်အသင်းတိုင်းဟာ အပြောင်းအလဲတွေနဲ့ အသင်းကို တည်ဆောက်နေကြတာဖြစ်ပါတယ်။
ပထမကစားကွက် ၄-၄-၂ ဖြစ်နေပေမဲ့ ၅ မိနစ်အကြမှာ ၄-၃-၃ ဒါမှမဟုတ် ၃-၄-၃ လည်းဖြစ်ချင်ဖြစ်သွားတာပါ။
အဲဒါကြောင့် လူတော်တော်များများက ထင်သလို ကျွန်တော်က,ကစားကွက်တစ်ခုတည်းကိုပဲ တရားသေကိုင်စွဲထားတာမျိုး မဟုတ်ဘဲ ကျွန်တော့်အနေနဲ့လည်း အပြောင်းအလဲတွေလုပ်ဖို့ ဆန္ဒရှိပါတယ်”လို့ ဖြေကြားခဲ့ပါတယ်။